KONBERSU SABI


Nes di meu téra kastanhu

Sol é mistériu txuba é Deus

Y bentu-l seka é Diabu

Infernu é txon toradu

Ómi é pedra Mudjer é lama

Azágua é kel ki ten pa da

Pabia disísu é disididu.



Pa dexa djakrás di dimóni

Tísa bentu runhu sima é kre

Sopradu radiadu lixaradu

Pueradu rodiadu malkriadu

Pa tadja-m pa kala-m

Pa trapadja-m pa mata-m



Má mi t'atxa-m txaskan

Pa N pupa y pa N rafila

Pa N riska bentu ku ponta-l nha dedu

Si xúxu ka spanta nen mi N ka ta taranta

Y si diaxi ka more nen mi N ka ta sokore


Mi môs kran sprítu bira-m tan

Korpu bira-m zan kriolu kria-m

Faze-m kabesa juíz labanta-m

Da-m kudadu xintidu sentra-m

Pa N ka kai na mon di ban-baran

Nen ki Dégu ben di djan-ban

Na konbersu d'Antóni Soldadu

Fika fladu santadu ramarkadu

Ma diskudadu ka ten rasguardu

Ma ntuadu ka ta tonba nsodadu.

Ma na raskunhu-l mundu

Nos é stadiu di kaza-l genti

Entradu oji manhan saidu

Mâ si bu dadu un kantu

Ka bu ndjutu-l gazadju

Se pa rasposta mal dadu

Anti fika ku voz trankadu

Si é di mata inda ka fladu

Si é di buli bason ka dadu


Len Viera morada Gentis Vera

Mi é la ki N konxe padas di pon

Katxor ladra-m ki N salta tapun

Po-m ki N bai ki da-m fadiga

Da-m ki N sai ki due-m bariga.



Dja di tenpu kunfiansa tendu

Era nomi pustadu na pinhora

Loru fadjadu na djakrandan

Luxu baxu d'aba kazimira

Lensinhu pó di téra na pontada

Un buné foradu boton na pala

Era sonbra-l sirkunstansia.



Toi di Kunta fazedor di barapó

Ta flába ma vara si marmelu

É prestu na ndôxa dizintuadu

Limaria nxinadu é pedra tadjadu

Firmadu na nkunhal d'amizadi

Fika ki N fika gó pa di pa si

Ka nkomoda-m ka molesta-m

Dému! Un kada kual na si getu

Rodia si roda é distora si pó



Nha Tóxa el ku si braza na téstu

Dianti fumador di rosmaninhu

Ta simira ta kuda fla ki fladu fla

Ku frango ratorku ta rafia franga

Laratixa lastradu na sol di makaku

Krias djuntadu na rol di pilon

Odja minhotu bedju ka ta gala

Ka ta dexa panhadu pinton



Manu ku si pingu buné na testa

Na ta ben pa di pa la ku si gaita

Pasu dismarkadu ku markason

Un voz N da-l é kudi-m na kodi

Ma simenti lanu mamulanu

Si txon é ratxa ponta-l rotxa

Si bu buska-l bu ka t'atxa-l

Si bu odja-l bu ka t'alkansa-l



Ma mi k’é sima boi brabíu

Ku briu ta fri-m ta txuputi-m

Ta solbe téra ta ladridja bafu

Rabu lângui-lângui ta bana trosa

Ponta nkrispadu txífri koronhadu

Ma si raiba-m N ta inbía tenpu

É ti na kontu flanu poi na nparu



Katxu sikinada pa laska laska

Ta djôngo fartu ta simira tenpu

Ta ozerba kaladu ta xinti paradu

Ku sodadi tripitxi kana sitridjadu

Kalda nparadu kalman bafadu.



Bônbia na prasa durmi na kutelu

Ka ta kume txon pabia é ka bokadu

Má si N ponta-l ponta nha ponteru

N ta fra-l N ta fri-l N ta poi simenti

Si gudja subi é pa basta-m paladar

Si ka fila é ti na kontu N pila kuza

Si pátxi N ta lâtxi si lâpi N ta karapi



Dona Nha Donana Monti Kunben

Fla libra é getu na pó di djugutu

Pabia lei fradu ma ka ten pekadu

Pidi ka dadu ma ka ten prosesu

Marmâsi ki nau nen lebi nen pizadu



Pabia justu ki justa koz ki perta sídja

Matxu di jornada é sela ku rabitxi

Albarda é kama karga buru femia

Lantuna era dizinfadu mininu matxu

Mantega kenti mesinha pa kura lanhu

Un kruzadu era kustu dun garafa leti

Konbidu ô konpostura era lei di benda



Pega nlôxa ndôxa é fla di sel

Lenbra é ka lenbra ma ten kelotu

Un otu otrun ki ta bá kaboku

Kabesa tamanhu xintidu poku

É sima sápa kortadu na kakutu

Ta da ka gó... ka pó… ka barapó

Fianpa é nkabadu na kaubranku

Stanlís é na lanseta pontu-mola

Sertanti nen bala nen babuneta



Mi N ka branku N ka pretu

N ka di pa li y N ka di pa la

Ami é riba-l mundu nha mi

Ti si ki N da y ti si k’é mi

Pa skerda mon di kanhotu

Pa sdreta mon di kelotu


                                         Kaká Barbosa